مدونة أم صويلح

عساكم من عواده العيد·· السموحة منكم، انشغلت بأيام العيد وماقدرت أتواصل وياكم، تعرفون عاد، ما جست الكمبتوتر إلا أمسات، عقب ما خلصت الحشرة، وخلصت الخردة· عاد شو أخبركم عن الخردة، ماباجي إلا أنهم يبيعون الدرهم بعشر، والدكاكين ما تعطي خردة، والصغارية وحليلهم ما فيهم صبر· من وين يجيهم الصبر؟ إذا الكباريه ما يعرفونه· و''فطوم'' ضربت الرقم القياسي في هذا العيد بعدم الصبر· ليلة العيد احتشرت علينا، واشتطت على ولدي ''صويلح'' يوم أنه أتأخر وما سار خذاها من الصالون إلا عقب ساعة ونص من اتصالها، تعرفون متى خلصت؟ الساعة أربع ونص الصبح، و''صويلح'' ما سار ياخذها إلا يوم طلع حق صلاة العيد·· و''حليله ولدي'' ما قدر ينش حقها، بروحه راقد متأخر، عنبو··· حد يتم في الصالون لين اربع ونص الصبح، أونه زحمة! زين يوم ''سلامة'' ما سارت وياها،، فديت عمرها حفيدتي الحلوة، قالت بخلي ''يدو'' تحنيني، طبعا ''فطوم'' ماتت قهر، وبغت تطيح علينا عقب ما ردت الفجر وشافت بنتها والحنة طابعة على خدها· شاسوي؟ هاي الغمسة، والبنية بغت ترقد، قمت لفيت كفوفها عشان تصبغ الحنة ذاك اللون الغاوي، وفعلا صبغت اللون المطلوب، لكن ما كان أبدا مطلوب على خدها!! مب بس هذا اللي قهر ''فطوم''،، صباح العيد لبسنا كناديرنا المخورة، وكل كندورة تفر الثانية، بس كندورة فطوم غييير شكل، شكلها غلط، شو السبب، ما ندري؟ هي أصلا نحيسة، ووايد تقرقع، وكله تضارب الخياط ''بابو''··· وين بعد أشياءها تضبط مثل الأوادم؟ حتى الأكل تناحس عليه، واشتطت على النعمة، وقالت حق شو كل هالأكل اللي مسوينه؟ وعاد نحن وحليلنا ما سوينا شي· صدق وحليلها ''بي بي'' بشكارتي ما قصرت، لا تركت حلو ولا مالح إلا وسوته، البلاليط، والخنفروش، والمحمر بالدبس، والخبيصة والعرسية والبثيث، والقرص المفروك والغميلي والكباب والساقو،، مول مول ما تركت شي؛ لكن بعد، هذا العادي،، بس هي ''فطوم'' صدقوني نحيسة، وكله تتحرطم، ويوم يت ''أم عبدالله'' -جارتي اليمنية- تعايد علينا وجابت وياها ''بنت الصحن'' والشفوت''، هي كلت ''العرسية'' وأنا كليت ''الشفوت''··· تمت ''فطوم'' تطالعنا ولاوية بوزها·· ويوم سألتني ''أم عبدالله'': شو بلاها مرت ولدج؟ رديت عليها وقلت: ودريها·· ترها مسوية ريجيم عن الوناسة·