الفرق ساعة!!

سبيجه: إنتي ليش مستعيله.. بعده وقت.. إصبري.. شو بلاج؟! أم صويلح: لا.. تأخرنا.. موووول مافي وقت. سبيجه: وين تأخرنا.. المباراه الساعة ثمان إلا ربع.. بعده وقت. أم صويلح: إنتي ترمسن عن أي مباراه؟! سبيجه: إيييييي نسيت.. تعالي.. أنتو بتلعبون قبلنا!! ما عليه اتخربطت. أم صويلح: ماشاء الله عليج. نسيتي بعد! سبيجه: ماعليج.. بعده وقت.. بيوبون ميوه وسحه.. (فواكه وتمر)... مو تقولين خمس وربع بعده باجي وااااايد عالمباراه. أم صويلح: أي ميوه وأي سحه.. يا حرمة أقولج ماشي وقت... وأكيد زحمه. يقولون 20 طيارة ياية من البلاد. أخاف ما نحصل مكان. سبيجه: إصبري لا تخافين.. بنسوي حليب وزنجبيل وكركديه.. يقولون زين. يخفف من التوتر العصبي. أم صويلح: ماحد موتر أعصابي غيرج.. سبيجه: أقولج.. خذي برنوص.. سريده.. الرياييل ما يتحملون. أم صويلح: لا تحاتيني.. إنتي بس قومي.. ماشي وقت.. وصويلح متصل من ساعتين يقول خلنا نسير. سبيجه: أقولج أم صويلح.. توه الناس.. الساعة اربع.. وتقولين مباراتكم خمس وربع.. استاد الوطني في مدينة عيسى حذالنا.. بينه وبينها فرة حصا. أم صويلح: بعد.. خلنا نتجدم أحسن. سبيجه: أم صويلح.. لحظة لحظة.. مباراتكم الساعة اربع وربع موب خمس وربع! أم صويلح: لاااااه.. أنا متأكده.. شوفي الجدول.. خمس وربع. سبيجه: يا حرمه.. هالجدل بتوقيتكم في الإمارات.. بتوقيتنا في البحرين اربع وربع. أم صويلح: شووه؟! سبيجه: يعني يا متدودها.. مباراتكم عقب ربع ساعة.. اشربي اشربي حليب وزنجبيل أحسن لج.. ماشي وقت.. تابعيها في التيلفزيون.